رأي عام بقلم د. احمد سالم جامعة مانشستر : علي السريع والجنيه والاقتصاد المصري رايح علي فين وهل مصر هتفلس زي لبنان ؟

د. احمد سالم
مستشار صندوق المساعدات الفنيه والتكنولوجيه لوزارة التعليم العالي واستشاري المجلس الوطني للتعليم والتدريب
استاذ استراتيچيات ادارة الاعمال جامعة مانشستر

اساسا من العبث اننا نرتكز علي معلومة ان الاحتياطي النقدي بقي -50 ونقول اننا رايحين للسيناريو اللبناني لان ده وضع وده وضع ، عشان الناس تفهم بس من عشر سنين الدين الداخلي كان حوالي 950 مليار واصبح 7.5 تريليون ،بنستورد في الشهر ب 7 مليار ،الدين الخارجي وصل ل140 مليار عشان كده ومن تلات سنوات انا وغيري حذرنا مي موضوع الديون وافتكر سحر نصر كل اسبوع كانت بتطلع علينا بتلات قروض بالوان وانواع وشروط مختلفه وكانها بتعمل انجاز وحال الاقتصاد كان بيلعب لعبه اشبه بالقمار يعني بتاخد قروض وبتجذب الاموال الساخنه  عشان توضب البيت من الداخل .

فتقدر تبني اساس محترم تقوم عليه اكبر اقتصاد في المنطقه بس للاسف البداية كانت الكرونا مرورا بالتضخم العالمي ورفع سعر الفايده ونهاية بالحرب وارتفاع اسعار الطاقه والسلع الاساسيه يعني برميل البترول اللي كان 45 دولار وقت الموازنه وعشان انت حويط خليته ب60 دولار النهارده معدي ال 100 دولار ده مجرد مثال  وخروج الاموال الساخنه يعني صحيت الصبح اختفي من علي خريطة الاقتصاد اكتر من 15 مليار وده لوحده كفيل انه يعجزك   ،طيب ده معناه انه خلاص لا طبعا الحد الادني من الامان للاحتياطي يبقي تغطية تكاليفك لمدة 6 شهور يعني 42 مليار وعشان كده السعودية والامارات اتدخلوا بتغطية ال15 مليار اللي خرجوا وبكده انت الاحتياطي بتاعك رجع لخط الامان (الادني)  لانه كمان اثر علي ديونك من ناحيه تانيه.

الديون بتاعتك متقسمه 13% امد قصير والباقي علي المدي الطويل توصل ل30 سنه عشان كده الاحتياطي ب-50 % مش نعاية العالم بس لو مخدتش بالك الرجوع هيبقي صعب ،مصر لم تتخلف يوم عن اداء ديونها والتصنيف الاتماني بتاعك زي الفل ،عندك استقرار سياسي فموضوع لبنان ملوش اي علاقه بموضوعنا من قريب او بعيد. 

الحل ان الحكومه لازم تتقلب تبقي حكومة اقتصاد من المقام الاول وننسي المهندسين والدكاترة وعطماء البترول مع احترامي للجميع ومش كل ما تتنزنق تخفض العمله او تبيع لان ده حل مدي قصير زي حقنة البنج ولما تفوق الالم هيكون اصعب ،لازم توقف المشاريع اللي مش اولوية لازم تبدا تزود التصدير وتقلل الواردات لازم تخفف الضغط علي لم الدولار وتلغي قصة الاعتمادات المستندية (والله ما وقتها)  لازم يتم ادماج الوزارات ويتم عمل برنامج تقشف حكومي ،انسي القروض خالص الفتره دي ولازم تلاقي حل تاني غير رفع البنزين لان ده هيدخلنا في دوامه تانيه…  اللهم بلغت ورمضان كريم